زمان و انا صغير
......هتتقسموا لمجموعات كل مجموعه فيها 3 من قسم اتصالات و 3 من قسم مدنى و
ده معمل الفيزياء بالكليه عامل زى خليه النحل , الكل مشغوول عشان التجارب تنجح و رحت على مجموعتى و
انتى إيناس مش كده؟؟
تطل من عينى الدهشه و انظر له بتعجب
أيوه أنا... شكلك مش غريب عليا
و كمان نستينى!! أنا بقى عمرى مقدر انساك( يقولها باسما و ساخراً)ء
أنا عمرو اللى كنت معاكى فى المدرسة
أخيرا وضحت الرؤيا بعدما ظننت أنى مطالبه فى قضية ثأر
أيييوة افتكرتك إزيك عامل إيه؟ بقى انت بقى رحت مدنى, صدفه سعيدة جداً ( و وضعت ابتسامه على وجهى- دائما ما اجد صعوبه فى الابتسام لمن يقتحمونى فجأة)ء
ايه بقى حكاية عمرى ما اقدر انساك شكلك كدة كنت بتعزنى بالشقلوب؟
أصل مقدرش انسى البنت الوحيدة فى حياتى اللى صفعتنى على وجهى؟؟
إيه أنا عملت كده؟؟؟ عجب الدنيا ظهر علنا و الصدمة هزتنى انا انا الملاك الهادى اللى بكلم الناس بالعافيه عملت فى المسكين دة كدة!!! إزاى؟؟
و إية.. علشان كنت بتكلم!!!ء
أنا!! إزاى و ليه و امتى؟؟
أيوه انتى . كنت واقفه علينا فى الفصل و طبعا كنت غيظانى بغرورك اياه و لقتينى بتكلم
اسكت
مش هسكت
اسكت
مش هسكت
مش هسكت
طااااااخ نزلت ايدك عليا صارووخ
.أنا عملت كدة, يا خبر. انا أسفه اوى مش عارفة أعتذر لك ازاى
يا ستى المسامح كريم . بس انتى كنتى صحيح مغروره كده ليه و دايما حطه ايدك فى جيبك و مش عجبك حد؟
انا مكنتش مغرورة ولا حاجة. حرام عليك . أنا بحط ايدى فى جيبى عشان دى عادة مش أكتر و لحد دلوقتى لو صادفنى جيب فى هدومى
.بحط ايدى فيه بحركة لا إرادية
أما انا ضربتك كدة ليه فانا معرفش. بس يمكن عشان كنتوا دايما تغلسوا عليا. فلما جاتنى فرصة السيطرة عليكوا فى الفصل و انت حبيت تغلس حصل اللى حصل بس أنا والله اسفة. يا خبر بقى انا اعمل فيك كدة, سامحنى
و كالعادة محدش يقابلنى من الناس بتوع زمان الا و يقولى " كنت طالعه فيها أوى" و دة جزاء انى كنت بتكسف و اخجل من الناس اصبح فى نظرهم مغرورة. يا ناس مفيش واحد بس يعذرنى؟؟
posted by Eanass Abouzeid @ 3:01 pm
11 comments
